महाराष्ट्रातील लाखो महिलांसाठी आनंदाची बातमी आहे. मुख्यमंत्री माझी लाडकी बहीण योजना अंतर्गत फेब्रुवारी महिन्याच्या सन्मान निधीच्या वितरण प्रक्रियेला अधिकृतपणे सुरुवात झाली आहे. राज्य सरकारकडून 27 मार्चपासून तांत्रिक प्रक्रिया सुरू करण्यात आली असून लवकरच पात्र लाभार्थ्यांच्या खात्यात पैसे जमा होणार आहेत.
मुख्यमंत्री माझी लाडकी बहीण योजना : फेब्रुवारी महिन्याच्या सन्मान निधी वितरणाची प्रक्रिया सुरू !
— Aditi S Tatkare (@iAditiTatkare) March 27, 2026
मुख्यमंत्री माझी लाडकी बहीण योजनेतील सर्व पात्र लाभार्थ्यांना फेब्रुवारी महिन्याचा सन्मान निधी वितरित करण्याची तांत्रिक प्रक्रिया आजपासून सुरू करण्यात आली आहे. पुढील २-३ दिवसांत सर्व…
महिला व बालविकास मंत्री आदिती तटकरे यांनी सोशल मीडिया प्लॅटफॉर्म X वर पोस्ट करून ही माहिती दिली आहे. त्यांच्या माहितीनुसार, पुढील 2 ते 3 दिवसांत सर्व पात्र महिलांच्या आधार-लिंक केलेल्या बँक खात्यात हा सन्मान निधी जमा केला जाणार आहे. त्यामुळे अनेक महिलांची प्रतीक्षा आता संपणार आहे.
सरकारकडून या योजनेच्या यशस्वी अंमलबजावणीसाठी सातत्याने प्रयत्न केले जात आहेत. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या मार्गदर्शनाखाली ही योजना प्रभावीपणे पुढे चालू आहे. यामुळे राज्यातील महिलांचा सरकारवरील विश्वास अधिक दृढ होत आहे.
मुख्यमंत्री माझी लाडकी बहीण योजना: ३१ मार्च पर्यंत e-KYC दुरुस्तीची संधी!
— Aditi S Tatkare (@iAditiTatkare) February 6, 2026
e-KYC प्रक्रिया करताना काही लाभार्थ्यांकडून चुकीचा पर्याय निवडला गेल्याने योजनेचा लाभ मिळण्यात अडचणी येत असल्याच्या तक्रारी प्राप्त झाल्या आहेत. विशेषतः ज्या पात्र लाभार्थ्यांनी e-KYC करूनही त्यांना अद्याप… pic.twitter.com/tggmXwgtOa
दरम्यान, ज्या महिलांना अद्याप योजनेचा लाभ मिळालेला नाही किंवा e-KYC प्रक्रियेमध्ये काही चुका झाल्या आहेत, त्यांच्यासाठी सरकारने महत्त्वाची संधी उपलब्ध करून दिली आहे. ऑनलाइन पोर्टलच्या माध्यमातून 31 मार्च 2026 पर्यंत e-KYC माहितीमध्ये दुरुस्ती करता येणार आहे.
महिला व बालविकास विभागाने स्पष्ट केले आहे की, e-KYC करताना चुकीचा पर्याय निवडल्यामुळे अनेक लाभार्थ्यांना अडचणी येत आहेत. त्यामुळे ज्या महिलांना लाभ मिळालेला नाही त्यांनी वेळेआधी आपली माहिती दुरुस्त करून घ्यावी, जेणेकरून त्यांना योजनेचा लाभ मिळू शकेल.
